Wasiirkii hore ee arrimaha dibadda Somaliland Md. Maxamed Biixi Yoonis, ayaa cadeeyay inaanu ka bixin isbahaysiga dimuqraadiyad doonka xisbiga KULMIYE, isagoo xusay inaanay jirin sabab uu uga baxaa, sidoo kalena sheegay in shirkii Muuse Biixi Cabdi lagu doortay uu ahaa mid afduubna oo la afduubay.
Maxamed Biixi, oo ka jawaabayay qoraalo lagu baahiyay qaar ka mid ah mareegaha Internetka iyo shabakada bulshadu ku kulanyo ee Facebook-ga, ayaa sheegay inuu weli taaganyahay mawqifkiisii hore. Qoraal uu soo saaray wuxuu Maxamed Biixi Yoonis ku yidhi sidan “Dhamaan shacabka reer Somaliland meelkasta oo ay joogaan waan salaamayaa, waxaanan Ilaahay uga baryayaa bash-bash iyo barwaaqo inuu siiyo.
Marka xiga waxa aan beeninayaa warar aan sal iyo raadtoona lahayn, oo ku soo baxay bar-kulan-nada bulshadu ku wada xidhiidho qaarkood (Social Communication Media Networks). Warkaasi waxa uu sheegayay in aniga oo ah Maxamed Biixi Yoonis, kana mida siyaasiyiintii saluugay afduubkii xisbiga Kulmiye ka dhacay 10. Nov. 2016 ka, in aan ka baxay Isbahaysigii Dimuqraadi-doonka Xisbiga Kulmiye.
Waxa aan leeyahay kamaan bixin Isbahaysiga Dimuqraadidoonka Kulmiye, sabab aan uga baxaana meesha mataalo. Wixii aanu saluugnayna waa sideedii oo wax isbadalay ma jiraan.
Markaa waxa aan kula talinayaa bahda saxaafadda guud ahaanteed in ay ka waantoobaan wararkaas aan salk iyo raadka toona lahayn ee ay qaar ka mid ahi faafinayaan.”
