Somaliland: “Danteenu Kuma Jirto In La Fuliyo Wixii Ay Guurtidu Kordhisay” Faysal Cali Waraabe

Gudoomiyaha xisbiga mucaaridka ah ee Ucid Eng Faysal Cali Waraabe ayaa ka hadlay dib u dhaca mar kale ku yimid wada hadalkii u dhaxeeyey xukuumada iyo xisbiyada mucaaridka ah.

Gudoomiye Faysal Cali Waraabe oo la hadlay warbaahinta ayaa waxa uu sheegay inay ogol yihiin inuu shirku dib ugu dhaco maalinta bari ah, waxaanu tilmaamay inay rajaynayaan in madaxweyne ku xigeenku shirka keeno xal siyaasi ah.
Gudoomiyaha Xisbiga Ucid Eng Faysal Cali Waraabe

Gudoomiye Faysal oo ka hadlaya dib u dhaca wada hadalka ayaa waxa uu yidhi “ Anaga oo ixtiraamayna madaxweyne ku xigeenka oo shirka gudoominayey waanu ogolaanay in beri uu shirku dib ugu dhaco, Markii ay guurtidu soosaartay go,aanka bilaa sharciga ah Ucid ayaa madaxweynaha ka codsaday wada hadalka waxaanan arkaynay inay arintaasi keenayso khilaaf iyo aduunkii oo inaga taga inaga oo maanta u baahan mucaawino ictiraafna doonayna haddii aduunku inaga tagana isma bixin karayno, Madaxweynaha waxaan ku idhi mudadaas ay goysay guurtidu kuu dan maaha dalkana dan uma aha sharaftaadana way dilaysaa ee aynu arintaas meel ka soo wada istaagno madaxweynuhu wuu arkay khatarta ay leedahay, waana ku ceeb madaxweynaha in wixii uu diidayey 2009-kii inuu maanta difaaco waanay ku xun tahay, dadka waxaas wadaana maaha dad u danaynaya madaxweynaha waayo waxaynu ogayn halka uu ka taagnaa korodhsiga guurtida iyo sharci darada in maanta la yidhaa waa looga ergaynayaa waxaan arkaa inaanay ahayn fikradiisa, waxana waxa wata dad calculator sita oo xisaabsanaya maalinba intii dadka ka soo gali jirtay mana ah dad u danaynaya dalkeena.”

Gudoomiye Faysal Cali Waraabe waxa uu sheegay haddii aan xal la gaadhin inta ka horaysa wakhtiga u hadhay xukuumada inaanay aqoonsan doono mudo kordhinta ay sameeyene guurtida waxaanu yidhi “Anagu waxaanu nahay gurmad ilaalinaya danta dalka somaliland iyo sharafta madaxweynaha, madaxweynaha waa la sharfay waana la doortay waana inuu sharaf ku qabtaa doorashada oo aan lays xag xagan, waxaanu sheegaynaa anagu haddi ay gaadho 26-ka June iyada oo aan xal laysla gaadhin dawladaas ma ictiraafayno, guurtidu wixii ay kordhisay ma ictiraafayno, waxaana iman doonta sidii aanu ku wada tashanay barigii hore aniga iyo Madaxweynuhu inaanu qaban doono shir qaran oo aanu samayn doono dawlad umadu ogoshahay oo doorasho inoo qabata dalkanina doorasho la,aan socon maayo, dadka waxaanu waydiinaynaa 22 bilood oo laba doorasho inoo yaalaan maxaa la qabanayaa, waa dad laba mayd u yalaan soo in mid uun la aaso maaha, dan somaliland ah lama wado.”

Ugu danbayntii gudoomiye Faysal Cali Waraabe waxa uu fariin u diray shacabka somaliland waxaanu yidhi “Waxaad kala doorataan shacabka somaliland-now inaynu u danayno kooxo kiish daloola wata iyo inaynu dalkeena iyo umadeena u danayno, danteenu kuma jirto inay doorashadaasi u dhacdo sanadka 2017-ka, danta umadana kuma jirto inay laba sanadood boodo doorashadii la doonayey inay dhacdo 2015-ka waana inaynu meel uga soo wada jeedsano inaanay arintaasi dhicin oo aan dalkeena khal khal la galin, waxaanan leeyahay kubada xaga xukuumada ayey taalaa ilaahay ayaanan ka baryeynaa inuu caqli siiyo, haddii ay la yimaadaan xal siyaasi waa noo furan tahay haddii ay la iman waayaan talo ayeynu iskugu imanaynaa waxaynu arkaynaa inay dadkani yihiin kuwa danaysanaya balse aanay ahayn kuwo dalka u danaynaya, waxaanan leenahay danteenana maaha in la fuliyo wixii ay guurtidu kordhisay.”

Comments

comments