Libiya oo diidan Qorshaha EU ee la dagaalanka Tahriibta

Dowlada Libiya ayaa diiday qorshaha Wadamada EU doonayaan inay uga hortagaan kooxaha ka ganacsada Tahriibta.

Qorshahan oo lamid ah kii EU-da ee la dagaalanka BurcadBadeeda Soomaaliya ayaa la doonayey in maraakiib iyo ciidamo ka socoda Midowga Yurub la geeyo xeebaha Liibiya, balse dowlada Liibiya ayaa sheegtay inay taasi tahay ku xadgudub Madax-banaanideeda.

Xukuumada Caalamka Aqoonsan yahay ee Libiya ayaa Salaasadii shalay si rasmi ah u sheegtay in ciidamo ka socda EU aysan soo geli karin biyaha iyo dhulka dalka Libiya.

Warkan kasoo baxay dowlada Libiya ayaa sidoo kale lagu sheegay in dowladaasi diyaar u tahay inay Midowga Yurub kala shaqeyso la dagaalana tahriibta balse aan lagu soo xad-gudbi karin badeeda iyo xeebaha dalkaasi.

Midowga Yurub ayaa hada diyaarinaya ciidamo ay si wadajir ah dalalkaasi u sameenayaan kuwaasi oo xaruntoodu noqon doonto dalka Talyaaniga.

Balse qorshahan ayaa u muuqda mid caqabad weyn hortaagan tahay kadib diidmada qayaxan ee ka timid dowlada Liibiya oo Qaramada Midoobay u gudbisay go’aankeeda.

Sidoo kale dowlada Ruushka oo xurguf siyaasadeed ka dhaxeyso Midowga Yurub ayaa sheegtay in ay horjoogsan doonto qorshaha EU-da hadii la horkeeno Golaha Amaanka, halka dalka UK uu oo isna xubin joogta ka ah golahaasi uu Midowga Yurub ka balanqaaday inuu qorshahan marsiin doono Qaramada Midoobay.

Comments

comments