Somalilamd: Dalalka Somaliland Ka Taageera Dimmuqraadiyadda Oo Gaadhay Laba Qodob Oo Adag Oo Somaliland Khuseeya Iyo Nuxurka Qodobada

321

Wadamada Somaliland ka taageera nidaamka Dimuqraadiyadeed iyo doorashooyinka ayaa gaadhay go’aan adag oo khuseeya taageeradooda Maaliyadeed ee dhinacyadan.

Dalalkan ayaa go’aansaday inaanay taageero dhaqaale ku bixin doorashooyinka Madaxtooyada Iyo Baarlamaanka Somaliland kadib dib u dhac iyo muddo kordhin yimid dartood,waxaanay raaceen inaan wax taageero ah laga gaysan Labada Doorasho iyo waliba qaybinta Kaadhadhka diiwaangalinta Codbixiyayaasha.

Sidoo kalena waxay dalalkan isku raaceen qodob Labaad oo ah in hadii Somaliland ku guul daraysato inay qabato doorashada Madaxtooyada ee qorshaysan November in dalalkani qaadaan talaabooyin culus oo saamayno baddan yeesha.

Diblomaasiyiin ka socda dalalkan ayaa siyaasiyiin reer Somaliland ah u sheegay in dunidu ka niyad jabsan tahay Somaliland dib u dhac iyo muddo kordhinta aan xadka lahayn dartood,waxaanay sheegeen in niyad jabkaasi keenay in dhaqaalihii lagu bixin jirey Dimmuqraadiyadda iyo Doorashooyinka lagu soo riixo Somaliland inay iska bixiso.

Waxa kale oo ay Diblomaasiyiinta dalalkan ka socotay u sheegeen Siyaasiyiinta Reer Somaliland in hadii ay Somaliland qabsan waydo Doorashadaas November ay dunidu faraha ka qaadi doonto lagana yaabo inay gasho go’doon Siyaaseed.

Waxaanay  ku adkaysteen in lagu dadaalo in doorashada Madaxtooyada la qabto wakhtigeeda isla markaana ay noqoto mid lamid ah Doorashooyinkii hore ee jawiga Nabada ah dalka ugaga qabsoomay.

Diblomaasiyiinta dalalkan ayaa sidoo kale sheegay inay Somaliland dib u dhaca doorashooyinka ku wayday saaxiibo  badan oo kulamada calamiga ah ee aanay Somaliland goob jooga ka ahayn uga doodi jirey kana difaaci jirey kuwaas oo niyadd Jab darteed meel iska dhigay taageeradoodii Somaliland.

Doorashooyinka Somaliland ee Baarlamaanka iyo Madaxtooyada Somaliland ayaa noqday caqabado soo waajahay horumarkii Somaliland ku jirtay,waxaana uu Golaha Wakiilada Somaliland uu  kursiga fadhiyaa ilaa 2005 halka madaxwayne Siilaanyo kursiga ku fadhiyo tan iyo 2010.

Comments

comments