London: Shirkii Dawladda Ingiriisku U Qabanaysay Somalia Oo Furmaaya 11-ka Bisha Iyo Xukuumadda Farmaajo Oo Wafti Hordhac Ah Dirtay.

157

Iyadoo 11-ka bishan lagu wado in magaalada London uu ka furmo shir looga hadlayo arrimaha Soomaaliya oo ay ka qeyb galayaan in ka badan 40 dowladood iyo ururo caalami ah ayaa wafdigii u horeeyay dowladda Federaalka u dirtay.

Wafdigan ayaa waxaa hoggaaminaya Madaxa Qaban qaabada shirka London ee dowladda Federaalka C/raxmaan Ceynte ahna La Taliyaha Madaxweynaha. C/raxmaan Ceynte ayaa wareysi uu siiyay Telefishinka SNTV xaruntiisa London ayuu kaga hadlay arrimaha shirka iyo qaban qaabada socota, isagoo tilmaamay in shirka fursad u yahay Soomaaliya.

Waxaa uu sheegay in qaban qaabada shirka ay soo wadeen saddexdii bilood ee u dambeeyay, isla markaana qorshaha yahay sidii dowladda Federaalka shirka London ula tagi laheyd hadaf mideysan oo la taaban karo.

Mr Ceynte ayaa xusay in in afar ajande looga hadlayo shirka, kuwaadoo ka mid ah 1- Amniga, 2- kobcinta iyo dib u soo nooleynta dhaqaalaha 3-siyaasada iy dib u eegista dastuurka 4- Qaabka wada shaqeyneyd ee Soomaaliya iyo Beesha Caalamka.

Waxaa uu xusay in qodobadaas ay ku hoos jiraan qodobo badan oo muhiim u ah in laga heshiiyo, isagoo tusaale u soo qaatay qodobka amniga oo qorshihiisu yahay dhismaha ciidan oo qaab dhismeedkiisu ay ka hor-yimideen Xildhibaanada.

Sidoo kale arrinta dhaqaalaha ayuu sheegay in loo baahan yahay in Soomaaliya laga cafiyo deymaha lagu leeyahay oo ah 5.5 bilyan oo dollar, oo Soomaaliya ay ku leeyihiin 28 dal, Hey’ado iyo bankiyo caalami, waxaana uu tilmaamay hadii aan deymahaas la cafin aanay Soomaaliya tabar u yeelan karin dib u dhiska dalka.

Wasiirkii hore ee Qorsheynta C/raxmaan Ceynte ayaa sheegay in shirka London looga hadlayo arrinta maqaamka Muqdisho, oo ka mid ah qodobada ku hoos jira ajandaha siyaasada, isla markaana loo baahan yahay in laga heshiiyo.

Madaxweynaha Soomaaliya Maxamed C/llaahi Farmaajo, Ra’iisul Wasaaraha Britain Theresa May iyo Xoghayaha Guud ee Qaramada Midoobey ayaa si wada jir ah u shir guddoomin doona shirka ka furmaya London 11-ka bishan.

Comments

comments