Somaliland: oo Lacag cusub soo Daabacday, xillii sarrifkii Doolarku cirka isku sii shareerayo

793

Lacag ka badan Laba milyan oo Doolar oo lagula tacaali lahaa qiimaha Doolarka oo lagu soo daabacayo lacagta cusub

Xukuumadda Somaliland ayaa dhawaan dalka keeni doonta Shilling Somaliland cusub, kaasoo ay imika ku maqan yihiin mukhalasiin sanadihii u danbeeyey ay xukuumaddu Qandaraas hoose ku siisay Daabacada Shilling Somaliland-ka.

Ilo wareed rasmi ah ayaa Waaheen u sheegay sababta ay xukuumaddu lacag Doolar ah u galin weyday Suuqa Sarrifka lacaga ee Qiimaha Doolarku kor usii kacayo oo caado xukuumadda u ahaan jirtay markan oo kale inay Doolarka ay hayso Suuqa galiso ayaa sheegay inay Doolarkii ay haysay ku soo daabacanayso Shilling Somaliland cusub.

Lama Oga Noodhadhka cusub ee ay Xukuumaddu soo daabacday inay yihiin kuwii hore ee shanta kun ugu saraysay iyo inay Noodhadh ka badan soo daabacday, hase yeeshee waxa la filayaa inay maalmahan lacagtaas cusub soo gaadho Baanka Dhexe ee Somaliland.

Xukuumadda Somaliland ayaa halkii ay Doolar ka soo galin lahayd Suuqa si qiimaha hoos loogu dhigo, waxay mushaharooyinka socda bishan ku bixisay Shilling Somaliland-kii cusbaa ee Kaydka ahaa, taasoo dadka Odorosa suuqa lacaguhu ay ku tilmaameen inaanay Xukuumaddu haynin Lacagtii Shilling Somaliland-ka ahayd ee Suuqa hore loo galiyey, taasoo lacagtii lagu soo xarayn lahaa ay tahay tan lagu soo dabaacayo lacagta cusub.

Lacagta cusub ayaa la sheegayaa in uu soo daabacayo ninkii lacagihii u danbeeyey ee intii xukuumadda Kulmiye talada haysay la wareegay soo daabacaada lacagaha cusub ee Somaliland, kaasoo macaash buuran oo aanay cidi u qiysaan ka dul qaata marka mashruucani usoo baxo.

Baanka Dhexe ayaa gacmaha ka laabtay wax ka qabashada qiima dhici shilling-ka Somaliland oo maanta uu boqolka Doolar marayo in ku dhaw sagaal boqol oo kun oo Shilling Somaliland ah, halka wasaaradda Maaliyaddu-na ay la tacaalayso bixinta Mushaharooyinkii shaqaalaha, ciidamadda iyo kharashaadka kale ee maalinlaha ah.

Agaasimaha Guud ee Baanka Dhexe ee Somaliland C/laahi Xasan ayaa safar aan ujeedadiisa la shaacin ku maqan muddo, waxaanu iska gooshay dalalka Jabuuti iyo Ethoipia oo uu ku sugnaa bishan u danbaysay oo dhan.

Guddidii madaxweyne Siilaanyo u magacaabay wax ka qabashada Sicir bararka iyo sarrifka Lacagaha qalaad ayaa iyana guul-daraystay, kadib markii talaabooyinkii ay qaadeen noqdeen kuwo daaqadda ka baxay, tusaale ahaana qiimihiiay sarrifka shilling Somaliland-ka iyo Doolarka u jareen oo xadhkaha dib u goostay.

Soo noqoshadii Madaxweyne Siilaanyo iyo Wasiir Samsam ee toddobaadkan oo la filayey inay ka gil-gishaan duruufta adage e dadweynaha haysata inay wax ka qabtaan ayaan illaa hada wax talaabo ah qaadin, iyagoo Og Abaar iyo Sicir barar inay kala goosteen.

Comments

comments